Një tjetër video e dhimbshme shfaqet në Khan Younis në Gaza. Një nënë bën thirrje të dëshpëruar për ushqim, e shtrirë përtokë e teksa prek dheun me duar. Ajo thotë në ngashërim se palestinezët kanë Zotin, i cili është vendstrehimi i përhershëm.
“Zoti na mjafton! Ai mundëson gjithçka, Zoti na mjafton ne! Na keni lënë pa bukë, ju monstra. Dashtë Zoti, shtete arabe të marrin atë që meritojnë!”, dëgjohet teksa thotë ajo.
E bërë publike nga CNN, videoja po bën xhiron e rrjetit dhe me mijëra komente dënojnë sulmet izraelite në Rripin e Gazës. Jo më larg se sot, 3 qershor, janë vrarë rreth 27 persona e janë plagosur rëndë 90 të tjerë teksa prisnin për të marrë ndihmat ushqimore.
Ditë më parë, u vranë edhe 30 palestinezë, po në të njëjtën mënyrë.
Kujtojmë se Organizata e Kombeve të Bashkuara ka bërë thirrje që rastet tragjike të hetohen.
“Jam i tmerruar nga raportet për palestinezët e vrarë dhe të plagosur ndërsa kërkonin ndihmë në Gaza dje. Bëj thirrje për një hetim të menjëhershëm dhe të pavarur për këto ngjarje dhe që autorët të mbahen përgjegjës”, deklaroi më herët, Sekretari i Përgjithshëm i OKB-së, Antonio Guterres.
Siç duket, propozimi i Shteteve të Bashkuara për armëpushim nuk po funksionon.
