Një 32-vjeçar humbi jetën ditën e djeshme në Spitalin Ushtarak, disa orë pasi ra nga lartësia e malit në zonën e Bovillës. Viktima, që u identifikua nga policia me emrin Denis Hala, ka rënë aksidentalisht nga lartësia e një mali në liqenin e Bovillës, ku për pasojë ka gjetur vdekjen disa orë më vonë në spital.
Ngjarja ndodhi ditën e djeshme në rrugën e “Zall Herrit”, në Bovillë. Kanë qenë disa qytetarë që ndodheshin me ekskursione private në këtë zonë që janë informuar në lidhje me atë që kishte ndodhur. Sipas dëshmitarëve, viktima ka qenë pjesë e një grupi personash që kishin shkuar në zonën ku ndodhi aksidenti për ekskursion. Viktima mësohet se kishte zbritur në një terren të vështirë për t’u larë në një pus uji që ndodhej pranë vendit të ngjarjes.
Pasi është larë, ai ka dalë nga uji dhe po ngjitej në shpat kur ndodhi ngjarja. Gjatë lëvizjes në faqen e malit, 32 vjeçari, në rrethana ende të paqarta, është rrëzuar dhe për më shumë se një orë ka qenë e pamundur që t’i shkohej në ndihmë nga personat që ndodheshin në të njëjtin grup udhëtimi bashkë me të. Ata kanë dhënë alarmin duke njoftuar policinë. Në median sociale ditën e djeshme u publikuan edhe foto e video, ku dëshmitarët kishin filmuar trupin e gjakosur të viktimës dhe që bërtisnin “Ndihmë, ndihmë, thërrisni Policinë dhe helikopterin, ky po jep shpirt!”. Forca të shumta të policisë, zjarrfikëset dhe ekipi mjekësor kanë shkuar në vendngjarje për t’i dhënë ndihmën e parë, bënë me dije dje burimet zyrtare të Policisë së Tiranës. Gjithashtu, në vendngjarje ka shkuar dhe helikopteri i Ministrisë së Shëndetësisë, ku është bërë e mundur nxjerrja e viktimës nga zona ku kishte rënë.
I riu, pasi është transportuar në spital nuk ka mundur t’u mbijetojë plagëve të marra dhe për pasojë ka ndërruar jetë. Në lidhje me ngjarjen, policia bëri me dije se ka nisur hetimet, duke mbledhur provat e dëshmitë nga vendi i ngjarjes e më pas kanë vijuar me procedurat e hetimit, me qëllim zbardhjen e ngjarjes. Mbrëmjen e djeshme burime të policisë së kryeqytetit kanë thënë se ngjarja po hetohej në pistën e një aksidenti. Megjithatë, pritet përfundimi i autopsisë mbi shkakun e vdekjes së 32 vjeçarit për të zbardhur ngjarjen përfundimisht./Panorama
