Tifozë të Barcelonës, mund të festoni! Klubi katalanas ka konfirmuar se Neymar ka firmosur rinovimin e kontratës, që e mban atë në “Camp Nou” deri më 30 qershor 2021. A mund të ketë lajm më fantastik se ky për mbështetësit e kampionëve të Spanjës? Me siguri që vetëm njoftimet për Lionel Messi-n janë më emocionuese, por kur merr vesh se sa do të jetë klauzola e largimit e brazilianit, kupton se bëhet fjalë jo vetëm për një futbollist, por një markë globale. Nëse një klub bind ish-sulmuesin e Santosit të largohet nga Barcelona, duhet të paguhen plot 200 milionë euro për prishjen e kontratës, teksa klauzola rritet në 222 milionë euro qershorin e ardhshëm dhe një vit më pas në 250 milionë euro.
Lojtari brazilian, emri i të cilit është përmendur lodhshëm për një kalim te PSG-ja, me këtë firmë dha një sinjal të qartë se shtëpia e tij është Barcelona. “Jam me të vërtet i lumtur që rinovova. Këtu ndihem si në shtëpi”, – tha Neymar në “Barca TV”. “Para se të vija këtu, sigurisht që e dija se bëhej fjalë për një klub gjigant. Lojtarët janë të jashtëzakonshëm dhe, nga jashtë, kjo më frikësoi pak para se t’i bashkohesha skuadrës. Por sapo hyra në dhomat e zhveshjes, ishte e qartë se sa me këmbë në tokë ishin ata. Kjo më goditi dhe më ndihmoi që të hidhja mirë hapat e parë”, – shpjegoi më tej pasuesi më i mundshëm i dyshes Lionel Messi-Cristiano Ronaldo për fronin e më të mirit në botë.
