Fshati Bukmirë në Mirëditë është përfshirë nga një zjarr i përmasave të mëdha mesditën e sotme.
Ministri i Mbrojtjes, Niko Peleshi përmes një njoftimi në “Facebook” bën me dije se aksionit për shuarjen e flakëve i është bashkuar dhe një helikopter i Forcës Ajrore.
Ndër të tjera, Peleshi thotë se zjarri është i qëllimshëm dhe se policia po punon për identifikimin dhe kapjen e autorëve.
“Helikopteri i Forcës Ajrore sapo i është bashkuar aksionit për shuarjen e flakëve në fshatin Bukmirë në Mirditë, ku zjarri ka marrë përmasa të mëdha. Frocat zjarrfikëse nga Mirdita, Tirana, Kukësi e Burreli janë duke punuar nga terreni. Dyshimet janë se si në Krujë ashtu edhe në Mirditë zjarret janë të qëllimshme. Policia po punon për identifikimin e tyre dhe sipas ligjit të gjithë autorët do të ndëshkohen”, shkruan Peleshi.
Ndërkohë, kujtojmë se për shkak të zjarrit të rënë u bë stakimi i linjës Rrëshen-Kaçinar, ku për pasojë mbetën pa energji elektrike, pjesërisht fshatrat Shtuf, Kaçinar, Arrëz, Shëngjergj, Gjinal, Qafvorrëz, Bukmirë, Simon, Karricaj, Shpërdhazë në Rrëshen dhe pjesërisht Ungrej, Fregen, Kalur, Kalivac, Kashnjet, Gjobardhaj në Lezhë.
Ndërsa, linja do të mbahet e kyçur deri në normalizimin e situatës dhe eliminimin e rrezikut nga zjarri./Opinion.al
