Policia e Shkodrës ka zbuluar dhe ka shkatërruar 6 mini-sera ku ishin të kultivuara 270 bimë të dyshuara cannabis sativa.
Në një njoftim për mediat, uniformat blu bëjnë me dije se falë informacioneve policore u mësua se dy shtetas nga fshati Baks, kishin ngritur 6 minisera brenda të cilave kishin kultivuar bimë narkotike.
Më pas janë referuar materialet në Prokurori, e cila ka regjistuar procedimin penal dhe pas disa javë hetimesh proaktive, u organizua operacioni policor i koduar “Baks 2”.
Në kuadër të operacionit shërbimet e Policisë duke përdorur dhe dronë për të monitoruar lëvizjet e autorëve, kapën dhe arrestuan në flagrancë shtetasit: O. J., 33 vjeç dhe L. Sh., 28 vjeç, të dy banues në fshatin Baks, Velipojë.
Këta persona janë kapur në flagrancë nga shërbimet e Policisë duke zbuluar nga plasmasi miniserat, të cilat gjatë natës i mbulonin me plasmas.
Grupi hetimor sekuestroi në cilësinë e provës materiale një sasi të bimëve narkotike dhe prova të tjera që do ti shërbejnë hetimit, ndërsa pjesa tjetër e bimëve u asgjësua me anë të djegies.
Materialet procedurale i kaluan Prokurorisë për veprime të mëtejshme.
