Lideri i LSDM, Zoran Zaev që me gjasë do të jetë Kryeministri i ardhshëm i Maqedonisë doli në një deklaratë për mediat, i fashuar, një natë pas dhunës së tmerrshme në sallën e parlamentit.
“Kemi bërë një hap të madhe në proceset demokratike. Shumica parlamentare ka zgjedhur kreun e Kuvendit dhe do të vazhdojmë me formimin e institucioneve tjera. Uroj Xhaferin dhe deklaroj se mbështesim fort”, tha Zaev.
Duke folur për ngjarjen e të enjtes në mbrëmje, ai tha se një pjesë e dhunuesve ishin pjesëtarë të policisë dhe disa të tjerë banditë që kishin për qëllim eliminimin e tij fizik.
“Ishte një tentativë për të më vrarë siç e patë edhe vetë. Ishte një veprim i koordinuar edhe nga forcat policore”, tha Zaev.
Më tej deklaroi se nuk do t’i përgjigjet ftesës së Presidentit Ivanov për tu ulur në bisedime, duke e cilësuar atë si përgjegjës për atë çfarë ndodhi mbrëmë brenda dhe jashtë Kuvendit.
Duke komentuar ndërhyrjen me vonesë të policisë, lideri i LSDM-së theksoi se mbrëmë u shkel Kushtetuta dhe ligjet e Republikës së Maqedonisë dhe se do të kërkohet përgjegjësi nga të gjithë. Me këtë rast deklaroi se Shefi për Rendin dhe Sigurinë në Polici, Mitko Çavkov të ikë sa më larg Maqedonisë. Emri i këtij të fundit u përmend edhe nga ministri i Brendshëm, Agim Nuhiu, i cili tha se “Çavkov ka vepruar me urdhëra politik të Gruevskit”.
