Mediat italiane kanë publikuar momentin kur 36-vjeçarja nga Durrësi, Elona Kaleshi, arrestohet nga policia pasi akuzohet për vrasjen e çiftit shqiptar në Itali, Shpëtim dhe Teuta Pasho.
Rreth orës 7:30 të mëngjesit të sotëm, karabinierët ekzekutuan një urdhër ndalimi të lëshuar nga zyra e prokurorit të Firences, ndërkohë që dyshohet se 36-vjeçarja nuk ka vepruar e vetme.
Elona Kaleshi akuzohet për vrasje, fshehje dhe masakrim të trupave të dy bashkëshortëve. Sipas hetuesve dyshohet se vrasja ka ndodhur për shumën prej 40 mijë eurove që kishte Shpëtim Pasho, i cili i kishte fituar pasi kishte bërë një aksident në punë.
Kaleshi, e cila rezulton emër i njohur për vjedhje dhe mashtrime, tashmë është marrë në pyetje por mediat italiane raportojnë se ajo ka përdorur të drejtën e saj për të heshtur. Kaleshi mohon çdo përfshirje në ngjarje dhe përmes avokatit të saj, Federico Febbo, ka thënë se nuk është takuar me bashkëshortët Pasho në ato ditë.
Shpëtim dhe Teuta Pasho u zhdukën në Nëntor të vitit 2015. Ata kishin shkuar në Firence për të pritur djalin e tyre të lirohej nga burgu, ku vuante një dënim./Opinion.al
