Familljarët e Agim Bucit, i cili u vra para dy ditësh në Kamëz kanë kërkuar dënim maksimal për autorët e krimit, ndryshe do bëjnë vetëgjyqësi. I vëllai i tij, Rifat Buci është shprehur se hajdutët tentuan të vrisnin edhe kunatën e tij.
“Policia rëndësi ka që i ka kapur në kohë rekord, që natën e parë më tha shefi i komisariatit i ka pasur brenda. E ka fajin pushka se ai ia ka drejtuar edhe gruas që e ka plagosur. Siç i ra vëllait në zemër, do ti binte edhe asaj. Mirëpo e ka fajin pushka. Dhe përdorim një fjalë ne kur të fal pushka të falet gjaku. Por të vijë tjetri të ç’njerëzojë familje. Po ti shkoj atij djali ta ç’njerëzoj, si i vjen atij? A njeh familje?”, shprehet mes dhimbjes Rifat Buci.
Ndërsa e motra e tij, Lume Dika shprhet më e ashpër, ajo thotë se gjykata duhet ti dënojë maksimalisht dy autorët, se do të hakmerren. “Të bëhet drejtësia ose do ketë vetëgjyqësi. Ma vranë vëllain në derë të shtëpisë, ishte punëtor, nuk i prishte punë askujt”, tha Lume Dika, për televizionin Ora News.
Dy ditë pas ngjarjes së rëndë në Kamëz, ku u vra Agim Buci në dyqanin e tij që e kishte ngjitur me oborrin e shtëpisë dhe mbeti e plagosur e shoqja, policia ka vendosur në pranga autorët e dyshuar, Vladimir Kurti 28 vjeç, Ruzhdi Hode 25 vjeç, të dy banues në Kamëz. Ata kane kryer bashke grabitjen, por ekzekutori direkt i Bucit, është Vladimir Kurti, person i rrezikshem me precedente te meparshem penale.
*Në foto autori Vladimir Kurti
