Fondet e Bashkimi Europian keqpërdoren. Kështu u shpreh kryebashkiaku Erion Veliaj teksa iu referua çështjes se romëve në bregun e lumit për të cilët janë dhënë fonde, të cilat nuk i kanë zgjidhur problemet e këtij komuniteti.
Erion Veliaj: Ka më shumë organizata sesa 100 familjet rome që në fakt paguhen nga Bashkimi Europian për të mbrojtur këtë lloj kauze, ndonjëherë më rezulton që ka më shumë interes që kauzat dhe krizat të vazhdojnë që të justifikohen projektet pa fund dhe konsulencat pa fund që në fakt sa paguhen para për konsulenca ne mund të kishim mjaftueshëm para për t’iu blerë të gjithëve një shtëpi. Ndonjëherë institucione si bashkia nuk kanë mundësi të aksesojnë një qindarkë për të bërë sistemime të tilla. Unë besoj që është një moment reflektimi që fondet e Bashkimit Europian mos të përdoren më për të shpikur rrotën. Jemi në një situatë kur çdo njeri në Shqipëri është i mbiseminarizuar, i mbikonferencizuar, i mbitrajnuar për të gjitha çështjet. Ka ardhur koha që të bëjmë gjëra konkrete.
Gjatë konferencës me temë “Parandalimi dhe lufta kundër parregullsive financiare”, Veliaj tha se mungesa e drejtësisë shton skepticizmin për fonde të reja.
Erion Veliaj: Sigurisht që humbet kredibiliteti i vendeve në rajonin tonë por në rastin konkret i Shqipërisë teksa kërkon më shumë fonde në Bashkimin Europian por i ka kthyer gjykatat në një markatë ku duhe ta blesh drejtësinë me para dhe sigurisht një burokrat në Bruksel e ka gjithmonë më të vështirë të rrisë fondet.
Gjatë konferencës u vu në dukje se vendi ynë ka përfituar rreth 20 milionë euro vetëm vitet e fundit nga programi IPA Adriatik. /TV KLAN
