Kryeministri Edi Rama i është përgjigjur këtë të hënë akuzave të Partisë Demokratike e cila deklaroi dje se harxhon 120 mijë euro nga paratë e shqiptarëve për të udhëtuar me charter privat për udhëtimet private.
Në një video të publikuar në rrjete sociale, kreu i qeverisë i përgjigjet denoncimit dhe pyetjeve të bëra nga deputetja e PD, Oriola Pampuri.
Kreu i qeverisë i mohon këto akuza duke u shprehur se udhëtimet e tij private janë të pakta, dhe nuk paguhen nga buxheti i shtetit.
“Ndiqeni një minutë ju lutem, se si pasi 5004 delegatë u ulën në 1958 karrige, 345 Euro prodhuan 120 mijë Euro karburant…”, shkruan Rama.
Më tej në video ai thotë: “Jam i pari kryeministër që udhëtimet e mia shumë të rralla private me familjen nuk i bëj me shpenzimet e shtetit. Kam përdorur biletë vajtje-ardhje, te ulëset ekonomike të Lufthansës, së bashku me gruan dhe djalin e vogël. Bileta ka kushtuar 345 euro. Mesatarja vjetore e shpenzimeve për udhëtimet e mia zyrtare, të cilat paguhen nga fondi i kryeministrisë, është më e ulët se sa mesatarja vjetore e shpenzimeve të paraardhesve te mi, për arsyen e thjeshtë se ata udhetonin në business class ndërsa une kam udhetuar thuajse tërësisht në ekonomik, me përjashtim të ndonjë rasti të veçante – e njejta gjë edhe për ministrat. Ndërkohë qysh prej vitit 2020, kur kishim presidencen e OSBE, u bë një marreveshje me kompaninë Air Albania dhe shpenzimi për vitin 2021 ishte nën mesataren e viteve të mëparshme. Sasia më e lartë vjetore e shpenzimeve për udhëtimet e mia zyrtare ka qenë 4.623.089 lek në vitin 2014. Ndërsa shifra 120 mijë euro karburant për fluturim privat, është produkt i të njëjtës aritmetike fantastiko-shkencore, që nga 1958 uleset e Pallatit të Kongreseve nxorri 5004 delegatë. Po t’i shumezosh këta delegatë me 30 dhe pastaj të zbresesh 30, dalin fiks 120 mijë euro karburant per 7×7 brava, baraz 42 fluturime.”/Opinion.al
