Gazetari Blendi Fevziu ka treguar detaje nga udhëtimi i tij në Ukrainë, duke u ndalur veçanërisht në qendrën e emigrantëve, në vijën kufitare mes Ukrainës dhe Polonisë.
I ftuar në emisionin “Rudina”në TV Klan, Fevziu ka përshkruar veçanërisht situatën e fëmijëve, që për më shumë se 30 orë qëndronin në radhë në temperaturat e acarta.
“Temperaturat ishin të akullta, është një i ftohtë që nuk e përballon dot. Unë gjatë dy ditëve rresht të gjithë pjesën e këmbëve e kisha të ngrirë nga i ftohti. Jam impresionuar se si fëmijë 5-6 vjeç rinin 30 orë në radhë, përjashta, në të ftohtë në pritje për t’iu afruar pikës së kufirit. Qëndronin me një disiplinë të jashtëzakonshme, ishim në pikën polake të kufirit, në pritje për të hyrë në Ukrainë. Dy djem, jo adoleshentë, ndoshta pak më të rritur kishin blerë qese të mëdha me karamele dhe sapo hynte një familje me fëmijë iu jepnin karamele. Të bënte përshtypje sepse secili prej fëmijëve thoshte faleminderit, buzëqeshnin, disa kishin frikë, shihnin nga prindërit “a duhet ta marr apo s’duhet”. Kjo është drama që sjell lufta”, tregoi gazetari.
Më tej ai ka treguar për mikpritjen polake dhe vullnetarët që çonin ushqime për emigrantët. Ndërsa ka shpejguar disa nga videot e regjistruar në këtë udhëtim, gazetari u shpreh:
“Ky është stacioni i trenit i qytetit të fundit polak ku të gjithë ata që punojnë aty janë vullnetarë, njerëz që gatuajnë supëra në shtëpitë e tyre dhe i çojnë me kazanë të mëdhenj ose kuti të mëdha plastike për t’i hedhur në kazanin e madh që do gatuhet për emigrantët. Këtu jam unë duke ngrënë supën e emigrantëve se më pas nuk kishte më në darkë, u mbyllën. I thashë “a mund të marr një pjatë supë se s’kam ngrënë?”, më dha edhe një sanduiç të vogël që të shoqëroja supën. S’kishte vend ku të uleshe, duhet të haje thuajse në këmbë. Ishte tavolina e vetme që i kishin vënë në dispozicion mediave dhe duhet të ishin rreth 70 gazetarë që vërtiteshin aty”./Opinion.al
