Një tërmet i fuqishëm me magnitudë 6.8 tronditi Greqinë orët e para të mëngjesit. Tërmeti ka shkaktuar dëme materiale në ishullin e njohur Zante, sipas agjencive të monitorimit të lëkundjeve sizmike.
Energjia elektrike në qytezën kryesore të quajtur po Zante u ndërpre, ndërsa shërbimet e zjarrfikëses raportuan dëme të mëdha të akseve rrugore, si pasojë e rrëshqitjeve të dherave.
Tërmeti goditi në pjesën jugore të ishullit në fjalë, të njohur edhe si Zakynthos, në detin Jon, rreth orës 1:50 të mëngjesit të sotëm me orën lokale.
“Nuk ka dëmtime shtëpish, të paktën sipas raportimeve të para”, tha një zëdhënës i shërbimit zjarrfikës për “AFP”-në.
Një monument bizantin i shekullit të XII në një ishull të vogël pranë Zantesë u dëmtua rëndë, sipas medieve lokale. Siç shihet në foto, rrugët që janë çarë në mes nga termeti i fortë.
Shërbimi amerikan i Gjeologjisë njoftoi se lëkundja kishte një thellësi prej 16.6 km (10 milje), e u pasua nga një tërmet me magnitudë 5, e më pas nga një seri paslëkundjesh të vogla. Sipas tij, pak gjasa ka që të jenë shënuar viktima.
Observatori i tërmeteve në Athinë njoftoi se lëkundja e tokës u ndie fuqishëm në Zante, një destinacion i njohur për turistët.
