Akademiku Genc Sulçebe, ka qenë një prej emrave të zgjedhur nga emisioni “Opinion”, si personazh i vitit 2020.
I ftuar disa herë në studion e emisionit “Opinion” gjatë vitit 2020, mjeku i njohur ka ndarë në mënyrë të vazhdueshme me qytetarët informacione serioze dhe të dobishme lidhur me virusin Covid 19.
Ndërkohë gjatë intervistës së tij, ai u shpreh se vaksina është zgjidhja përfundimtare e pandemisë.
“Vaksina është drita në fund të tunelit dhe që do jetë zgjidhja definitive e kësaj pandemie. Por rezultate të mira kemi patur edhe në studimin që kemi bërë ne si imunologji për shtrirjen e SARs Covid 2 në vendin tonë”, tha mjeku duke shtuar se e ardhmja shumë më e mirë dhe e rëndësishme tashmë do të jetë shpejtësia e aplikimit të vaksinës.
“Shpejtësia e aplikimit do të jetë shumë e rëndësishme në arritjen e imunitetit kolektiv dhe ndalimin e infeksionit. Shpejtësia e aplikimit është sfida që na pret në të ardhmen. Unë jam optimist që futja e disa vaksinave, sidomos ajo e Oksfordit që është shumë e lehtë për t’u aplikuar do të bëjë të mundur të kemi një imunizim të shpejtë të popullatës”, u shpreh Sulçebe./Opinion.al
