Një stuhi e fuqishme e cila ka rrëzuar pemë, ka thyer makina dhe kontenierë të mëdhenj ka bërë kërdinë në Moskë. Bilanci i situatës së rëndë siç raportojnë mediat e huaja, është një fëmijë i vdekur dhe janë plagosur të paktën 17 persona.
Një fëmijë vdiq pasi u dërgua në spital në gjendje kritike. “Mjekët nuk mundën të shpëtonin një vajzë që ishte në gjendje kritike. Unë shpreh ngushëllimet më të thella për prindërit e saj”, shkroi në reagimin e tij kryetari i bashkisë së Moskës, Sergej Sobjanin.
Qindra pemë u rrëzuan nga stuhia në kryeqytetin rus, shtoi ai.
Më parë, Ministria e Emergjencave kishte nxjerrë një paralajmërim për stuhinë e frikshme që pritej. Një burrë vdiq pasi u godit nga një objekt në periferi të Moskës, raportoi Interfax, duke cituar burimet e tyre në shërbimin shëndetësor të Moskës. Shërbimi shëndetësor i Moskës konfirmoi se të paktën 17 vetë u plagosën nga stuhia. Një fëmijë tre muajshe ishte ndër ata që u plagosën.
