Juventusi ia doli të merrte një tjetër 3 pikësh të rëndësishëm, në këtë fillim kampionati. Bardhezinjtë, në shtëpi përballë Lacios, fituan pastër me rezultatin 2-0, me nga një gol për secilën pjesë.
Në minutën e 30-të, ishte Pjaniç që me një goditje nga jashtë zone, mposhti Strakoshën, i cili nuk kishte asgjë çfarë të bënte. Juvja vazhdon të krijojë, por nuk ia del të shënojë. Në minutën e 75-të, në një harkim nga e djathta e Kanselos, është Strakosha që në momentin vendimtar i heq topin Ronaldos, i cili ngatërrohet dhe nuk godet drejt portës, por Manxukiç i gjendur pas portugezit, shënon me portën e boshatisur.
Kështu, Lacio del e humbur edhe në javën e dytë në Seria A, ndërkohë që Juventusi vazhdon me 6 pikë të plota.
