Thomas Strakoshës nuk po i ndahen penalltitë. Pas dy të tillave me kombëtaren shqiptare të futbollit, e treta ka ardhur sot me Lacion përballe Sasusolos dhe këtë radhë, e ka shkaktuar pikërisht portieri i përfaqësueses.
Në minutën e 26 të ndeshjes, Strakosha bëri një dalje shumë të gabuar duke hedhur në tokë Berardin e shkaktuar penallti, për të cilën u ndëshkua edhe me karton të verdhë. Sulmuesi i Sasuolos nuk gaboi nga pika e bardhë duke i dhënë avantazhin ekipit të tij.
Ky gabim ndikoi në paraqitjen e mëtejshme të portierit shqiptar i cili u shfaq disa herë i pasigurt dhe në minutat e fundit u shpëtua edhe nga shtylla pingule. Megjithatë, në fund edhe për të kishte festë, pasi Lacio arriti të shënonte dy herë me Imobilen dhe autogolin e Açerbit, për të fituar 2-1 dhe për të mbrojtur vendin e katërt në klasifikimin e Serisë A.
