Në kohën kur rikontruksionit të stadiumit “Loro Boriçi” në Shkodër i’u bë jehonë, emisioni investigativ “STOP” sjell anën tjetër të “medaljes” , pasojat që i erdhën sportit të peshëngritjes.
Lidhur me këtë, “STOP” ka udhëtuar drejt Shkodrës, aty ku peshëngritësit e këtij qyteti ankohen për kushtet tejet të vështira në të cilat ata janë të detyruar të stërviten.
Për shkak të rinkonstruksionit të stadiumit, peshëngritësit u zhvendosën në pallatin e sportit “Qazim Dervishi”. Por edhe tani që stadiumi është gati, trajneri Peti Tuzi, thotë, se askush nuk është kujtuar t’i sistemojë sërish, prej një viti e gjysmë ata vijojnë të stërviten në këto kushte skandaloze.
Peshngritësi 1 : “E vështirë është shumë sepse ka shumë pluhur dhe pedana kur çon shtangën nuk është fort e qëndrueshme.”
Stërvitesh çdo ditë ?
Peshngritës 1: “Pothuajse çdo ditë.”
Prej sa kohësh bën stërvitje?
Peshëngritësi 2: “Prej 6 vjetësh, siç e shikoni edhe ju janë kushte skandaloze.”
Për t’u larë si ja bëni?
Peshëngritësi 2: “Nuk lahemi këtu sepse nuk ka kushte në tualet. S’ka dush.”
Sauna ka këtu?
Peshëngritësi 2: “Jo jo nuk ekzistojnë.”
Peshëngritësi 3: “Kam 3 vjet e gjysmë që vazhdoj stërvitjen e peshëngritjes. Këtu është shumë e vështirë sepse kushtet nuk janë ideale, pasi pedanat nuk janë të barabarta dhe ne kemi pasur trauma të cilat na kanë ndaluar stërvitjen.”
Peti Tuzi, Trajner i Peshëngritjes: “Ashtu siç shihet, kushtet janë shumë të vështira. Në Qershor të vitit të kaluar u dha fondi nga qeveria për të rikonstruktuar stadiumin dhe në fillim të Qershorit na u prish palestra, dhe që nga Qershori ne bëjmë stërvitje në këtë ambient jo të përshtatshëm dhe që atëherë nuk është bërë gjë për palestrën. Është harxhuar 100 milionë dhe ne vazhdojmë në kushte shumë të vështira. Stadiumi është rikonstruktuar është dorëzuar dhe nuk e arsyetoj që një stadium është dorëzuar pa ambientet poshtë dhe në mënyrë të veçantë që ne e kemi pas të ndërtuar me kushtet optimale këtë palestër brenda stadiumit. Këta janë sportista duhet ajrosje, duhet pamje jashtë me drita nuk mund të bëhet stërvitje. Duhet furnizuar organizmi me oksigjen për me përballuar pesha të rënda. Kam patur një kontigjent prej 20 -25 sportistësh dhe i kam lënë, i kam koordinuar sepse nuk na lejon ambienti për t’u stërvitur të gjithë njëkohësisht. I kam nxjerr 3 herë në javë disa, 3 herë në javë disa.”
Aktualisht në këto kushte, sa sportistë stërviten?
Peti Tuzi, Trajner i Peshëngritjes: “5-6 sportistë në ditë.
Është e pamundur për të bërë më shumë sepse janë tri pedana dhe fatmirësisht nuk ka ndodhur diçka e rëndë me këto kushte që janë.”/tvklan.al
