Emisioni investigativ “Stop” ka denoncuar mbrëmjen e sotme rastin e një grope shumë të madhe në Shkozet të Durrësit, në lagjen Nr 14, tek ish-Ndërhyrja e Shpejtë.
Sipas banorëve të lagjes kjo gropë ka pothuajse tetë vjet që është hapur, dhe të gjitha ujrat e zeza shkarkohen në të, gjithashtu kjo gropë është shndërruar edhe në një vend të depozitimit të mbeturinave të hedhura nga njerëzit.
Banorët thanë se Bashkia e qytetit të Durrësit nuk ka ardhur ende për të verifikuar situatën e krijuar dhe sëmundjet që mund të marrin banorët e lagjes nga mbeturinat dhe pisllëku që është mbledhur.
Mirëpo, emisioni ka vazhduar një tjetër denoncim vetëm 50 m larg Bashkisë së Durrësit, ku një rast i ngjashëm paraqitet edhe aty.
Banorët thanë se kjo gropë është shndërruar në një makth të vërtetë, jo vetëm për faktin se aty është vetëm një gropë, por është një pisllëk i paparë.
Ndërsa, theksojnë se bretkosat që qëndrojnë aty janë kthyer në një simfoni muzikore tepër të veçantë.
Emisioni investigativ “Stop”, nuk është ndalur vetëm me këto raste, por ai ka paraqitur edhe një plagë tjetër të mosfunksionimit të kanalizimeve të ujrave të zeza të cilët derdhen vend e pavend.
Në Valias, një kanal uji i cili mund të ishte për bukuri i përdorur për vaditje, është shndërruar në një vend grumbullimi të pisllëkut dhe vendshkarkimi për kanalizimet e zeza.
