Emisioni “Opinion” në këtë sezon do t’i kushtojë një hapësirë të veçantë promovimit të vlerave qytetare, historike dhe kulturore të Shqipërisë përgjatë një udhëtimi në 7 qytete, brenda dhe jashtë kufirit zyrtar.
Këtë javë udhëtimi i gazetarit Blendi Fevziu është ndalur në qytetin e Gjirokastrës, nga ku ka sjellë elementë tërheqës turistikë, por dhe momente nga jeta e përditshme.
I njohur veçanërisht nga romani “Kronikë në gur” i Ismail Kadaresë, Sokaku i të marrëve është jo vetëm një rrugë e famshme e Gjirokastrës, por dhe një toponim i veçantë.
Ndërsa ndalet në këtë rrugë që lidhte shtëpinë e Kadaresë me shtëpinë e diktatorit Hoxha, gazetari tenton të zbulojë edhe arsyet e këtij emërtimi.
“Thuhet se ka pas dhe të marrë në këtë lagje dhe ka patur me të vërtetë, por gjatë dimrit kjo rrugë ka qenë e shtruar me gurë dhe ujërat që vinin krijonin një zhurmë që krijonte një kakofoni. Ndërsa në kohën e verës, kalonin të dehurit që binin nga sipër dhe merrenin me vete gurët, ndaj i ka mbetur ky emër”, shpjegon njëri prej banorëve. Ndërkohë gjatë komunizmit, rruga mori emrin “Rrugica e pionerëve” duke qenë se aty pranë ndodhej shtëpia e ish-diktatorit dhe Sokaku i të marrëve tingëllonte një emër jo i denjë për të./Opinion.al
