Policia ka arrestuar sot 48 vjeçarin Enver Disha i akuzuar se ka korruptuar gjyqtaren dhe prokuroren e Elbasanit. Bëhet fjalë për rastin e denoncuar 6 muaj më parë nga emision “Stop” në Tv Klan, ku Disha kishte rolin e sekserit, në rastin korruptiv të Gjykatës dhe Prokurorisë së Elbasanit, denoncuar në emisionin “Stop”. Kamera e fshehtë tregoi oficerin e policisë gjyqësore duke marrë 2 000 euro ryshfet për gjyqtaren. Në kamera oficeri thotë se këto para i ka për gjyqtaren ndërsa për prokuroren duhen edhe 1500 euro të tjera. Skema e korrupsionit bëhet për të nxjerrë nga burgu një të paraburgosur me emrin Kristjan Leka, raporton Opinion.al.
Në një njoftim për mediat, Policia e Tiranës bëri të ditur sot se “është arrestuar Enver Disha 48 vjeç, banues në Tiranë, pasi Gjykata për Krimet e Rënda Tiranë me vendimin e datës 29.06.2017, ka caktuar masën e sigurisë “Arrest në burg” për veprën penale “Korrupsioni aktiv i gjyqtarit, prokurorit dhe funksionarëve të lartë publikë, kryer në bashkëpunim”, parashikuar nga neni 319 / 25 i Kodit Penal.
Video-skandali në Stop
Gjyqtarja Pajtime Fetahu merr përsipër, që përveç vendimit të trupit gjykues, “ta rregullojë” edhe me prokuroren, që kjo e fundit të mos bëjë rekurs. Gjyqi shtyhet, pasi prokurorja Ermira Tafani është pa qejf, por edhe zëvendësuesi Neritan Hoxha, nuk lëviz nga e njëjta skemë. Gjyqtarja Pajtime Fetahu thotë, se për prokurorinë duhen 1500 euro të tjera dhe i paraburgosuri Kristjan Leka merr lirinë. Për këtë ngjarje është arrestuar edhe ish-oficeri i burgjeve Behar Kola që bënte edhe rolin e sekserit për gjyqtarët dhe prokurorët.
/R.Dedaj-Opinion.al
