Pas akuzave të kreut të PD Lulzim Basha se zgjedhjet në Dibër u fituan nga një kartel droge dhe pas denoncimit të “Fiks Fare” me video se si vëllai i Muharrem Ramës ka blerë votat, ka reaguar për herë të parë Kryeministri Edi Rama.
Në një status në Facebook, kreu i Qeverisë Shqiptare thotë se fjalët e tepërta janë fukarallëk dhe se rezultati ka rëndësi. Rama shprehet se ndjen detyrim ndaj dibranëve për besimin që i dhanë koalicionit të majtë.
Reagimi i Kryeministrit Edi Rama:
FALEMINDERIT!
Fjalët e tepërta janë vërtet fukarallëk, nën dritën e rezultatit kuptimplotë të zgjedhjeve të Dibrës!
I falenderoj megjithë zemër, një për një, të gjithë zgjedhësit dibranë, për besimin e jashtëzakonshëm që na dhanë, përmes votës për kryebashkiakun Muharrem Rama.
Dhe dëshiroj të nënvizoj se këtë fitore të madhe, unë e lexoj mbi të gjitha si një detyrim shumë të madh ndaj dibranëve.
Me mirënjohje të thellë, angazhim të madh e përunjësi në detyrë, ne do të bëjmë çmos të jemi në lartësinë e nderit të posaçëm që na bëri Dibra, me besimin e paçmueshëm që na dha sot!
