Ardian Braho, prokurori në emër të cilit oficeri i shpallur në kërkim Fatos Lushi mori 18 mijë euro, mohon akuzën.
Para kolegëve të Krimeve të Rënda, prokurori Braho ka shprehur gadishmërinë për një hetim të plotë, duke kërkuar të zbardhet e vërteta. Ai ka pretenduar se oficeri Lushi ka përdorur emrin e tij në këtë çështje, duke marrë paratë nga qytetari.
Sipas prokurorit, në asnjë rast nuk ka kërkuar apo përfituar dhe aq më pak shumën prej 18 mijë eurove që të lirojë nga sekuestrimi një llogari bankare prej 150 mijë eurosh.
Mësohet se prokurori Ardian Braho ka shpjeguar me detaje rastin në fjalë, duke i vendosur në dispozicion të prokurorëve edhe vendimin e sekuestrimit dhe më pas atë të pushimit.
Prokurori i pezulluar tashmë nga detyra ka shpjeguar se vendimi i pushimit dhe kthimit të shumës së sekuestruar ka ndodhur në fund të muajt korrik, i cili është arsyetuar dhe më pas është miratuar edhe nga kreu i prokurorisë së Tiranës.
Sipas dosjes hetimore, rezulton se shtetasit Gani Manollari i janë bllokuar llogaritë bankare që në korrik të 2014 dhe janë liruar në korrik të 2016. Kohë, kjo sipas prokurorit Braho ka zgjatur për shkak të përgjigjeve të letër-porosive të autoriteteve franceze e italiane nga edhe kanë ardhur paratë në Shqipëri.
Pas hetimeve, është arritur në konkluzion se paratë janë të ligjshme dhe për këtë fakt i janë kthyer qytetarit të bllokuar, i cili është hetuar për akuzën e “pastrimit të parave” në bashkpëunim.
Nga ana tjetër, mësohet se hetuesit e prokrurorisë së Krimeve të Rënda kanë sekuestruar dosjen e plotë të shtetasit Gani Manollari që ndodhet në arkivën e prokurorisë së Tiranës.
Sipas akuzës, prokurori Braho është paraqitur vullnetarisht mbrëmjen e së mërkurës në prokurorinë e Krimeve të Rënda për të dhënë shpjegime për rastin e denoncuar nga emisioni investigative “STOP” në Ttv Klan. Shpjegime të cilat ka vazhduar t’i jap edhe paraditen e së premtës në prokurori.
Nga ana tjetër prokruoria ka shpallur në kërkim oficerin Fatos Lushi, i cili duket në pamje filmike duke kërkuar dhe më pas duke marrë shumën prej 18 mijë eurosh që prokurori të firmosë vendimin e heqjes së sekuestros mbi llogaritë bankare të shtetasit G.Manollari. Sipas policisë, oficeri Lushi nuk është gjetur në banesën e tij dhe po punohet për identifikimin e vendit të fshehjes dhe arrestimin e tij.
