Kryeministri Edi Rama ka folur dy herë për taksën e Rrugës së Kombit për të cilën qindra-mijëra qytetarë në Shqipëri e Kosovës janë shprehur kundër pasi është shumë e lartë. Në seancën plenare të së enjtes (29 Mars) Kryeministri u shpreh se banorët përreth autostradës, sidomos ato të Kukësit nuk do përjashtohen nga kjo taksë, por do pajisen me abone. Por sot (31 Mars) pas protestës në Rrugën e Kombit, ku banorët reaguan ashpër dhe dogjën pikën e faturimit, Kryeministri ka ndryshuar qendrim. Ai është shprehur se do të bëhet më e mira për këta qytetare dhe se është i gatshëm të takojë dhe kryetarin e bashkisë.
Rama në parlament:
Nuk ekziston në asnjë vend të planetit, një teori që përjashton banorët si kategori nga detyrimet, pasi ata janë përdoruesit. Në të ardhmen vihet pagesa e një rruge tjetër, po themi Tiranë-Durrës, atëherë të gjithë banorët do përjashtohen? Diku tjetër, në një aks tjetër do përjashtohen edhe atje? Domethënë do përjashtohet e gjithë Shqipëria? Nuk ndodh! Ajo që duhet ta dinë njerëzit është se janë 120 mijë euro që kompania i jep pushtetit vendor për t’i përdorur për të lehtësuar barrën, duke e hequr plotësisht nga të gjithë ata që do përdorin transportin publik apo privat me autobusë, apo me furgonë. Ndërkohë që kontrata parashikon që në 6 muajt e parë do të përcaktohet në negociata mes qeverisë, ministrisë përkatëse dhe koncensionarit, ajo që quhet tarifa për përdoruesit e shpeshtë. Pra, nëse dikush e përdor rrugën për të ardhur nga Kukësi në Tiranë, apo për të shkuar nga Tirana në Kukës shpesh, atëherë përdoruesit e shpeshtë do të kenë zgjedhje me karta ku do të paguajnë jo shumën e të gjithë udhëtimeve që bëjnë bazuar në tarifa fikse, por një tarifë më të ulët.
Rama në konferencë pas protestës:
Do të bashkëbisedojmë, do të dëgjojmë me vëmendje dhe do të shpjegojmë me durim të gjithë të vërtetat e shtrembëruara, apo të mohuara krejt prej gënjeshtarëve dhe sharlatanëve të kazanit politik dhe mediatik. Ne jemi ulur me kompaninë, sipas parashikimit të kontratës, për t’i përcaktuar pagesat e posaçme mujore, disamujore, apo vjetore për përdoruesit e shpeshtë të rrugës. Kështu që të gjithë kundërshtuesit e pagesës aktuale në atë zonë, të cilët nuk kanë asnjë lidhje dhe asnjë gisht me krimet e rënda të ditës së sotme, të jenë të qartë dhe të jenë të qetë që për përdorimin e shpeshtë të rrugës nuk do paguajnë njësoj si përdoruesit e tjerë të saj. Ndërkohë që, pasi dje kryetari i Bashkisë së Kukësit më ka kërkuar me shkrim një takim për këtë temë, unë do të ulem me të qysh të hënën për të bashkëbiseduar, sigurisht duke shpresuar se deri të hënën, ai do të jetë distancuar jo nga kundërshtia për pagesën, por nga dhuna kriminale e ditës së stome.
/Opinion.al
