Kombëtarja kuqezi e 19-vjeçarëve ka pësuar një humbje minimale 3-2 përballë moshatarëve gjermanë në takimin e vlefshëm për kualifikueset e Europianit U-19 të 2017-s. Takimi i zhvilluar në “Selman Stërmasi” e shfaqi ekipin e Bellajt me dy fytyra, pasi në pjesën e parë dominuan totalisht gjermanët, ndërsa e dyta foli për ekipin tonë.
Në minutën e 8 ishte Kolhet që kaloi gjermanët në avantazh, ndërsa Shipnoski dyfishoi shifrat në të 33-tën. Hajrulla humbi një rast të artë për kuqezinjtë që të ngushtonin rezultatin, para se Baku të trefishonte në minutën e parë të shtesës së pjesës së parë.
Në pjesën e dytë futbollistët e kombëtares shqiptare filluan të guxojnë më shumë dhe në minutën e 78, Agim Zeka shndërroi në gol një 11-metërsh. Në minutën e dytë shtesë ishte po Zeka që realizoi një gol të mrekullueshëm pas një aksioni totalisht personal, por koha nuk mjaftonte që kuqezinjtë të tentonin barazimin e rezultatit.
Ndeshja tjetër e grupit mes Irlandës dhe Gjibraltarit përfundoi me shifrat 5-0 për irlandezët, dhe tashmë janë bërë të ditura dy ekipet e kualifikuara nga grupi jonë, të cilat janë Gjermania dhe Irlanda që udhëheqin me nga 6 pikë të plota. Në ndeshjen e fundit, pas 3 ditësh, Shqipëria ndeshet me Gjibraltarin, ku do të tentojë fitoren e parë për të përmirësuar golavarazhin, që do i jepte mundësinë të ishte një prej 13 vendeve të treta që kualifikohen në raundin elitar.
