Një shpërthim i fuqishëm tronditi Belgjikën mbrëmjen e djeshme. Dyshohet se lënda eksplozive i është vendosur një restoranti italian në Anver, pranë universitetit. 20 persona janë plagosur, ku 6 prej tyre janë në gjendje të rëndë. Restoranti ndodhet në pjesën e poshtme të një pallati 3-katësh, nga rrënojat e të cilit u nxor edhe një fëmijë. Tre ndërtesa të tjera u dëmtuan nga forca e shpërthimit.
Shkaqet e shpërthimit në rrugën Paardenmarkt, një zonë kjo e frekuentuar shumë nga studentë, nuk dihen ende, por autoritetet po hetojnë për zbardhjen e tyre. Mediat shkruajnë se ka dyshime për akt terrorist.
Anvera ka qenë në të kaluarën një prej vatrave më aktive të xhihadizmit salafist në vend. Shumë banorë të zonës kanë ofruar shtëpitë e tyre për të mirëpritur personat e prekur nga fatkeqësia.
