Një ditë më parë Ksamili u pushtua nga ujërat e zeza që vërshuan në det. Pushuesit u larguan të alarmuar dhe pamjet e plazhit të Podës krejtësisht të ndotur bënë xhiron e rrjetit. Por sot, Bashkia e Sarandës deklaron se ka arritur ta rehabilitojë zonën edhe me ndihmën e Ushtrisë. Në faqen zyrtare të Bashkisë së Sarandës që ka nën juridiksion edhe Ksamilin janë postuar videot e mëposhtme ku shihen pushues duke u larë në gjirin e Podës.
“Gjatë gjithë pasdites, mbrëmjes dhe natës së djeshme, deri ne orën 06:00 te mëngjesit të sotëm u be i mundur riparimi i defektit të ndodhur nën tokë që solli vërshimin e ujerave te ndotura deri ne keto gjire plazhesh. Testi i kryer ne orët e para të ditës dhe monitorimi përgjate dites, ka rezultuar funksional.
Ndërkohë që strukturat e specializuara kanë nisur të veprojnë për të përcaktuar shkakun dhe identifikuar shkaktarët e episodit të një dite më parë. Parësore për të gjithë faktoret, mbeti rikthimi ne normalitet, i cili eshte arritur plotesisht tashme. Videot flasin me shume dhe me bindshem se fjalet”, thuhet në deklaratën e Bashkisë së Sarandës.
Sakaq gazetari i televizionit informativ Ora News i cili raporton direkt nga Ksamili na sjell pamje ku uji duket sërish i ndotur edhe pse disa pushues kanë guxuar të lahen sot në këtë plazh apo të shtrihen në brigjet e dezinfektuara me klor. /Opinion.al
