Një video ku shihet një agjent i shërbimit rus të zbulimit, duke i dhënë para një zyrtari të shërbimit serb të sigurisë ka bërë që Presidenti Aleksandër Vuçiç të urdhërojë një hetim të raportimeve për atë që mund të jetë një aferë e rëndë spiunazhi.
Video u postua më 17 nëntor në YouTube dhe aty shihet një agjent rus duke i dhënë një çantë agjentit serb në Beograd, nga e cila ky fundit nxori një zarf me para. Autenticiteti i videos është konfirmuar nga Agjensia Informative dhe e Sigurisë së Serbisë, e njohur si BIA. Një zyrtar i saj, Rela Zhelski, pohoi se në video shihet agjenti rus i zbulimit, Georgij Kleban, por nuk dha asnjë hollësi për agjentin e dyshuar serb.
Ministri serb i Mbrojtjes, Aleksandër Vulin, është shprehur për mediat vendase se Presidenti Vuçiç do të mbledhë në takim shefat e shërbimeve të zbulimit dhe kundërspiunazhit.
“Situata është serioze dhe komandanti përgjithshëm (presidenti Vuçiç) do të shpalosë përfundimet pas shqyrtimit të hollësishëm”, tha ministri serb.
Ndërsa kryeministrja Ana Bërnabiç është shprehur se “nëse kjo del e vërtetë, do të jetë një problem i madh”.
Sipas mediave lokale, presidenti serb ka kërkuar një takim të menjëhershëm për këtë cështje me ambasadorin rus në Beograd, Alexander Bocan Harchenko.
Gazetari bullgar Christo Grozev, shkroi në Twitter ditën e publikimit të videos se aty shihet ish ndihmësi i atasheut ushtarak në ambasadën ruse në Beograd që po takohej me agjentin serb në një operacion të fshehtë.
Appears that – despite popular belief – some people in Serbian intel/law enforcement is not too happy with GRU’s activities in Serbia. This video of a GRU officer allegedly bribing an unnamed Serbian official was leaked to news media today https://t.co/QcIHkFWOIn
— Christo Grozev (@christogrozev) November 17, 2019
Nuk dihen ende implikimet që mund të sjellë kjo çështje në marrëdhëniet Serbi – Rusi. Të dy vendet janë aleate historike ndonëse Serbia synon anëtarësimin në BE por duke qëndruar jashtë NATO-s. Beogradi ka refuzuar t’u bashkohet sanksioneve perëndimore ndaj Rusisë për konfliktin në Ukrainë. Nga ana tjetër Kremlini mbështet pretendimin e Serbisë e cila nuk njeh pavarësinë e Kosovës. /Opinion.al
