Kompania Sony ka njoftuar se ka shitur mbi 900,000 njësi të produktit PlayStation VR. Lajmi u bë publik nga Andrew House, përfaqësues i kompanisë në Japoni.
Pajisja është lansuar në tetor të vitit të kaluar me çmim prej 399 dollarëve. House poashtu bëri të ditur se qëllimi i brendshëm i kompanisë ishte të shesë një milion njësi deri në prill, gjë që duket mjaft e arritshme tani.
PlayStation VR duket të jetë mjaft përpara konkurrencës – sipas një raporti të SuperData Research, deri në fund të 2016 janë shitur gjithsej 243,000 njësi Oculus Rift dhe 420,000 njësi HTC Vive.
Duke folur për famën e pajisjes në Japoni, House deklaroi se njerëzit atje presin në linjë të gjata jashtë dyqaneve kur ka stoqe të reja.
