Një video e re e publikuar tregon disa nga nxënëset nigeriane që u rrëmbyen dy vjet më parë, duke u dhënë kështu shpresë familjarëve dhe miqve për një rikthim të mundshëm të tyre.
Videoja e marrë nga CNN, me sa duket është filmuar në Dhjetor, ku tregon 15 vajzat me rroba të zeza duke u prezantuar.
Vajzat janë marrë nga një shkollë në qytetin e Chibok nga anëtarët e grupit islamik Boko Haram.
Rrëmbimi i 276 vajzave ka nxitur fushatën globale në mediat sociale #BringBackOurGirls , ku ka qenë e përfshirë edhe Zonja e Parë, Michelle Obama dhe shumë persona të tjerë publikë.
Me gjithë përpjekjet e tyre, shumica e vajzave janë ende të zhdukura. Këtë të enjte u shënua dyvjetori i zhdukjes së tyre.
Videoja e vajzave është e para që nga Maji 2014, kur rreth 100 prej tyre janë treguar në një video.
Grupi militant islamik në Nigeri Boko Haram rrëmbeu më shumë se 200 vajza nga një konvikt në qytetin verilindor të Chibok me 14 Prill 2014. Rreth 200 militantë të armatosur rëndë mbërritën gjatë natës me rreth 20 makina dhe rrëmbyen vajzat.
Përse u rrëmbyen këto vajza shkolle?
Në gjuhën e zonës Hausa Boko Haram do të thotë edukimi perëndimor është i ndaluar, ndaj dhe rrëmbimet tregojnë urrejtjen e thellë kundrejt edukimit perëndimor. Për më tepër, grupi promovon pikëpamjen puritane të islamit se vendi i femrës është në shtëpi.
Në shkollen e Chibok ku po mbaheshin provimet shkollore të fundit për vajzat kristiane dhe myslimane ishte ndër të vetmet që ishte ende e hapur në zonën e shtetit të Bornos dhe nuk kishte as mbrojtje sigurie atë natë./Klan
