Një ngjarje e rëndë është regjistruar në orët e vona të së hënës në Mexico City. BBC raporton se të paktën 20 persona kanë humbur jetën dhe dhjetëra të tjerë janë plagosur pasi mbikalimi i një metroje u shemb në kohën kur po kalonte një tren, thonë zyrtarët.
Disa vagonë u zhytën në tokë, duke zënë poshtë të paktën një makinë , e cila ishte në një rrugë. Ekipet e shpëtimit dhe zjarrfikësit vijojnë kërkimet për të mbijetuar.
Pamje dramatike që janë publikuar tregojnë mbikalimin duke u shembur në stacionin Olivos në Metro’s Line 12.
Kryetarja e Bashkisë së Meksikës Claudia Sheinbaum tha se 20 persona u konfirmuan të vdekur, pasi ajo mbërriti në vendin ngjarjes për të bashkërenduar operacionin e kërkimit dhe shpëtimit.
Ndërkohë që rreth 70 persona u plagosën, thanë shërbimet lokale të urgjencës.
“Kemi dëgjuar vetëm një zhurmë të fortë dhe gjithçka u prish,”- tha Mariana 26-vjeçare, e cila i mbijetoi aksidentit.
“Kishte shumë njerëz që qëndronin dhe ishin ulur në vagona”- tha ajo.
Ndërkohë një dëshmitar okular i tha rrjetit TV Televisa të Meksikës: “Papritmas pashë që struktura po dridhej”. “Kur u pastrua pluhuri, ne vrapuam … për të parë nëse mund të ndihmonim. Nuk kishte britma. Nuk e di nëse pasagjerët ishin në shok”,- tha dëshmitari.
Metroja e Mexico City është një nga sistemet më të mëdha në botë për transportin e shpejtë të udhëtarëve. Linja 12 ishte shtesa më e re në metronë e kryeqytetit, që u hap zyrtarisht në 2012./Opinion.al
