Ndeshja mes Kastriotit dhe Tiranës, në stadiumin “Redi Maloku” u mbyll me tension. Siç raportohet nga Fushë-Kruja, në momentet e mbylljes së takimit, është goditur lojtari i Tiranës, Grent Halili.
Gjithashtu trajneri i bardhebluve, Ardi Mema është afruar tek arbitrat për t’u kërkuar llogari për 11-metërshin e akorduar për vendasit në pjesën e parë. Por është ndaluar nga forcat e policisë së shtetit, dhe është përplasur pikërisht me këta të fundit. Për të qetësuar situatën është dashur ndërhyrja e futbollistëve dhe disa anëtarëve të stafit të skuadrës së Tiranës.
Kujtojmë se rastet e dhunës në Kampionat, nuk janë të izoluara, ndaj Federata Shqiptare e Futbollit ndërpreu më 7 mars zyrtarisht kampionatin e futbollit, pas bojkotit që shpalli Shoqata e Arbitrave.
Bojkoti i arbitrave erdhi pas dhunimit të gjyqtarit Eldorjan Hamiti në ndeshjen Kamza-Laçi. Ekipi i Kamzës u përjashtua kampionati, ndërkohë arbitrat shpallën bojkotin për shkak të dhunës në stadiume./Opinion.al
