Një gol i Jorginho-s në minutën e 33-të të pjesës së parë i ka dhuruar Napoli-t të Maurizio Sarri-t tri pikët e radhës në kampionatin italian dhe i ka lejuar këta të fundit të rimarrin vendin e parë në renditje, ku ishte ngjitur përkohësisht Inter pas fitores së djeshme të marrë në fushën e Cagliari-t. Miqtë kanë dominuar takimin nga fillimi deri në fund, por nuk kanë arritur të shënonin më shumë se një gol.
Vazhdojnë vështirësitë për Milan-in në kampionat. pas fitores bindëse 5-1 të marrë në Europa League kundër Austrisë së Vjenës, kuqezinjtë e Montella-s nuk kanë arritur të shkojnë më larg se një barazim pa gola në shtëpi kundër Torino-s. Një tjetër rezultat zhgënjyes ky për milanezët pas humbje 2-1 të pësuar në javën paraardhëse në fushën e Napoli-t. Bonuçi me shokë ndodhen në vendin e shtatë në kuotën e 20 pikëve, 11 pikë larg zonës Champions dhe 18 larg vendit të parë.
Një tjetër rezultat befasues ka qenë edhe ai i regjistruar në ndeshjen Genoa-Roma, me vendasit që kanë arritur të ndalin vrapin e verdhekuqve, të cilët janë paraqitur në këtë takim pas pesë fitoresh radhazi të marra në Serinë A. Gjithçka ka ndodhur në pjesën e dytë, me El Shaaraëy që ka kaluar në avantazh skuadrën e Di Francesco-s në minutën e 59-të, pas një asisti të Florenzi-t. Dhjetë minuta më vonë miqtë kanë mbetur me dhjetë lojtarë pas kartonit të kuq të drejtpërdrejtë të marrë nga De Rossi, i cili ka shkaktuar një penallti.
Te pika e bardhë është paraqitur Lapadula, i cili nuk ka gabuar. Kjo pikë e ka ngjitur Genoa-n në vendin e 17-të, ndërsa verdhekuqtë mbeten në vendin e katër me 30 pikë, 7 më pak se Napoli, por me një ndeshje për të rikuperuar.
https://www.dailymotion.com/video/x6alo6p
