Dy persona kanë rënë në prangat e policisë në Tiranë pasi u kapën në flagrancë gjatë tentativës për t’i dhënë një 23-vjeçari, një pako me rreth 1 kg kokainë. Gjithashtu është shpallur në kërkim 23-vjeçari që do të merrte pakon me lëndë narkotike.
Bazuar dhe në të dhënat e grumbulluara në rrugë operative, efektivët organizuan operacionin policor të koduar “White pack”, si rezultat i të cilit u bë kapja dhe arrestimi në flagrancë i shtetasve: S. Gj., 54 vjeç, banues në Maminas, Durrës dhe A. C., 42 vjeç, banues në Shijak.
Shërbimet e Policisë kanë evidentuar, në Marikaj, dy personat S. Gj. dhe A. C., duke i dhënë pakon me rreth 1 kg e 30 gramë lëndë të dyshuar narkotike kokainë, 23-vjeçarit që sapo ka vënë re shërbimet e Policisë, është larguar me vrap.
Në cilësinë e provës materiale u sekuestruan pakoja me 1 kg e 30 gramë lëndë narkotike kokainë, 2 automjete, një peshore mekanike, një aparat celular dhe shuma parash të dyshuara të përfituara nga kjo veprimtari kriminale.
Vijon puna për kapjen e 23-vjeçarit dhe identifikimin e personave të tjerë të përfshirë në këtë veprimtari kriminale”.
