Kryeministri Edi Rama ka publikuar në Facebook të shtunën në mëngjes, një video nga vizita inspektuese që bëri në kantierin e ndërtimit për rrugën e Ulëzës.
Rama shkruan se ky është një takim spontan në kantierin e rrugës që pas 40-vjetësh do t’a lidhë Ulëzën me rrugën kombëtare.
“MIRËMËNGJES
Dhe me këtë moment të bukur, mes njerëzish normalë, që jetojnë me problemet reale të jetës së përditshme jo me dokrrat e ububushme të kazanit të politikës e të medias, gjatë një takimi spontan në kantierin e rrugës që pas 40 vjetësh do ta lidhë Ulëzën e rilindur me rrugën kombëtare, ju uroj një fundjavë të qetë”, shkruan Rama në mesazhin e tij.
Nga video e postuar në rrjetin social, kryeministri Rama siç e citon dhe vetë, konsumon një bisedë spontane me banorët e zonës, ndërsa nuk kursen as humorin me ta, duke thumbuar kështu burrat.
‘Rrugën e kanë të gjithë nga gratë. Gratë më thanë që ne duam këtë rrugë, dhe ndaj e bëra. Për burrat asgjë nuk do bëj’, shprehet me humor Rama. Ndërkohë, ditën e sotme kryeministri Rama ndodhet në Dibër, ku do të mbahet dita e dytë e mbledhjes së qeverisë, (dje u zhvillua mbledhja e parë), ku do të prezantohet edhe projekti për rrugën e Arbrit.
