Kur kanë kaluar 3 ditë nga rënia e helikopterit në liqenin e Shkodrës prokuroria vazhdon hetimet për të zhardhur misterin e rrëzimit të tij. Mësohet se akuza e Shkodrës ka regjistruar procedimin për veprat penale “Të lëvizjes së trupave pa të drejtë si dhe shkelje e rregullave të fluturimit ajror” të parashikuara nga nenet 48 dhe 83 i kodit penal ushtarak.
Regjistrimi me këtë akuzë është bërë nga prokuroria pas dyshimeve se mjeti fluturues mund të mos ketë pasur stërvitje apo mision. Por kjo sqaron prokuroria do të zbardhet gjatë hetimit, pasi të shihet se çfarë ka regjistruar kutia e zezë.
Ndërkohë citimi i nenit 83 nga prokuroria nuk përjashton mundësinë, që pilotët mund të kenë shkelur rregullat dhe aksidenti të ketë ardhur nga një gabim njerëzor. Nisur nga këto dy pista hetimi, burime në prokurorinë e Shkodërs thanë se po verifikohen urdhrat e dhënë nga eprorët dhe veprimet e kryera nga pilotët.
Deri tani vemëndja e hetuesve është përqënduar tek nxjerrja e helikopterit nga uji dhe më pas do të kryehen veprimet hetimore, për konfirmuar akuzat e ngritura.
Ministria e Mbrojtjes njoftoi këtë të shtunë se ka nisur një hetim administrativ për ngjarjen.
Një pjesë të misterit pritet ta zbardhë dëshmia e ushtarit të plagosur Gerald Baramuça, i cili i shpëtoi aksidentit.
Grupi hetimor ende nuk e ka marrë dëshminë e tij pasi mjekët nuk e kanë lejuar për shkak të gjendjes së shokut, që ai ndodhet në spitalin e Traumës. Baramuca vazhdon të ruhet nën masa të larta sigurie nga policia ushtarake dhe do kontakt me të është i vështirë edhe për familjarët, derisa ai të japë dëshminë./ Xhevahir Zhabina, Tv Klan
