E prekur me zërin që i dridhej gjatë gjithë intervistës, këngëtarja Barbana Dini, motra e këngëtarit të ndjerë Ergi Dini ka folur për herë të parë në media që pas ndarjes së tij nga jeta.
Në një intervistë për emisionin “Thumb” Barbana ka treguar të gjithë kalvarin e vuajtjeve që pas vdekjes së Ergit e deri në ditët e sotme. Gjatë intervistës ajo ka vendosur një palë syze të errëta siç shprehet ajo të preferuarat e Ergit.
“Është një luftë e madhe e përditshme me boshllëkun, me dhimbjen me mallin me realitetin është shumë e vështirë për mua që të gjej fjalë për të përshkruar gjithë ato ndjesi që ndodhen brenda meje në këto momente. Pika ime e dobët dhe pika ime e fortë ka qenë gjithmonë familja. Duke qene e tillë mendoj se detyrimi im nuk ka mbaruar akoma në këtë jetë. Kam një detyrë më të madhe për të jetuar për dy. Realisht kanë ndryshuar shumë gjëra.
Në radhë të parë është ndryshimi i konceptit tim për jetën, jemi mësuar të mendojmë se e kemi çdo gjë në dorë dhe çdo gjë është rezultat i zgjedhjeve dhe gabimeve tona, dhe ky është gabimi i madh, sepse jetojmë dhe mendojmë sitë përjetshëm. Harrojmë që edhe ne do ikim një ditë nga kjo botë,”-shprehet Barbana në emisionin Thumb.
Gjithashtu ajo u shpreh se shumë nga ëndrrat e Ergit u lanë përgjysmë dhe se është detyra e saj për ti çuar ato deri në fund. “Ka qenë një kërkesë e prindërve të mi që të vazhdoj rrugën që ai e la përgjysmë dhe duke dashur ta kem prezent në jetën time. Kam vendosur të gjej forcën për të vijuar gjërat që ai la përgjysmë.
Janë disa këngë njëra është duet e me mua dhe pastaj janë edhe disa të tjera që do të këndohen nga unë do mundohem ta kthej dhimbjen në art që gjithmonë do i dedikohet vetëm atij. Ky është synimi im do jetë një investim i gjithanshëm për të dalë ashtu siç do të donte ai sepse i donte gjërat në perfeksion,”-thotë motra e Ergit Barbana./Gazeta Express/
