Rita Ora ka qenë mbrëmjen e djeshme në Prishtinë, në një koncert të mbajtur me rastin e Pavarësisë, ku sikurse ka bërë me dije përmes një postimi në instagram, kanë qenë të pranishëm të paktën 300 mijë persona.
Por duket se këngëtarja e famshme shqiptare, ka dashur të tregojë se nuk i ka harruar rrënjët e saj, kur së bashku me stafin, si surprizë për publikun ka sjellë një performancë të valles së Rugovës. Një surprizë, që duket se e ka ndezur skenën, teksa këngëtarja u është drejtuar të pranishmëve në gjuhën shqipe.
Në postimin e saj, lidhur me koncertin Rita shkruan:
“Sapo më thanë se rreth 300 mijë njerëz erdhën të më shikonin sonte. Gëzuar Ditën e Pavarësisë. Nuk mund të isha në asnjë vend tjetër të botës. E nisëm këtë bashkë dhe nuk mund të isha askund pa ju. Një falenderim special për skuadrën time dhe për qeverinë. Ka rreth 10 vite që performoj dhe kjo ndjenjë nuk largohet kurrë. Ju jam falenderuese. Jam krenare. Jam shqiptare”, përfundon Rita Ora postimin në Instagram.
