Rikthimi i “West Side Family” me këngën “Beso” rrëmbeu vëmendjen e të gjithëve dhe pati interes të madh në publik.
Pjesëtarët e grupit Landi Hysi dhe Armir Shahini ishin sot të ftuar në studion e “Rudina” në Tv Klan ku treguan si u realizua ky projekt dhe fabulën e tij.
Këngëtarët thanë se ky projekt është nisur nga i ndjeri Dr. Flori, i cili ia dedikonte djalit të tij dhe se mesazhi i kësaj këngë është besimi.
“Ndihet ende mungesa e Dr. Florit, ai ishte i pazëvendësueshëm. Por për këtë projekt ne kemi punuar shumë dhe ia vlejti. Mesazhi i këngës është: Lutu dhe beso.”
Ndërkohë Shahini tha se ky projekt është dedikim shpirtëror për Dr. Florin.
“Ky projekt ka qenë i Florit, ai ia ka dedikuar djalit të tij Danielit dhe ka punuar me vëllain e vet Albanin. Ky projekt ka nisur si dedikim shpirtëror për Dr. Florin. Ai kishte lënë të shkruar pjesën e parë dhe muzikën dhe për pjesën tjetër kemi punuar të gjithë bashkë”, tha Shahini.
