Reali i Madridit është kampion i botës për klube 2016, pasi mposhti 4-2 Kashima Antlers në finalen e luajtur sot në Jokohama të Japonisë.
Në fakt, ekipit të Zidanit iu desh të djersinte për të arritur triumfin e pestë botëror përballë surprizës së këtij edicioni. Japonezët e Kashimas janë e para skuadër aziatike që shkon deri në finale.
Pasi kaluan në epërsi me Benzemanë që në minutën e nëntë, kampionët e Europës u përmbysën nga dopieta e Shibasakit në fund të pjesës së parë dhe në fillim të së dytës (44’, 52’).
Megjithatë gëzimi i vendasve zgjati vetëm tetë minuta, pasi në të 60-n Kristiano Ronaldo riktheu baraspeshën nga pika e penalltisë.
Pas barazimit 2-2 në 90-minutëshin e rregullt, asi portugez u ngjit sërish në katedër duke vulosur “pokerin” e Realit dhe tripletën personale (97’, 104’).
31-vjeçari hyn në histori si i pari futbollist që kalon 100 golat në ndeshjet ndërkombëtare me klube. Me “hat trick”-un e sotëm, “CR7”-a ngjitet në kuotën 102.
