Një video ka qarkulluar në mediat e huaja, ku 5 ish-oficerë të autoriteteve amerikane në Memphi,kanë rrahur për vdekje një shofer.
Në video shfaqen 5 policët të cilët shkelmojnë dhe godasin shoferin 29-vjeçar, Tire Nichols.
Në lidhje me këtë situatë ka reaguar dhe presidenti i SHBA Joe Biden, duke thënë se është i trembur dhe kjo video është e tmerrshme.
Avokatët e familjes së Nichols e krahasuan sulmin me rrahjen e vitit 1991 nga policia të shoferit të Los Anxhelosit, Rodney King.
Policia fillimisht tha se zoti Nichols ishte ndaluar me dyshimin për drejtim të pakujdesshëm të mjetit, gjë që nuk është vërtetuar. Ai vdiq në spital tre ditë më vonë, më 10 janar.
Nichols ishte me ngjyrë, siç janë të pesë oficerët e akuzuar në këtë rast.
Departamenti i Policisë së Memfisit publikoi katër video ku shfaqen 5 oficerët teksa i bërtasin të zbresë nga mjeti.
“Unë nuk kam bërë asgjë!”, ka thënë Nichols. Oficerët kërkojnë që ai të shtrihet.
Një oficer bërtet: “Vëri duart pas shpine para se të thyej.”
“Ju po e teproni tani,” u thotë zoti Nichols oficerëve. “Unë thjesht po përpiqem të shkoj në shtëpi.”
Brenda pak sekondash, një nga oficerët qëllon me një Taser z. Nichols, i cili kërcen dhe arrin të ikë.
Ata e tërheqin atë në tokë dhe e mbështesin duke u ulur në makinën e policisë. Kanë kaluar më shumë se 20 minuta derisa të shihet një ambulancë duke mbërritur.
Videot tregojnë gjithashtu oficerët që po përqendrohen rreth rrëfimit të detajeve të incidentit ndërsa zoti Nichols shtrihet pas makinës.
Disa prej tyre pretendojnë se z. Nichols “u përkul” në drejtim të tyre ose u zgjati për të marë armët e tyre, megjithëse asnjë prej pretendimeve nuk është i qartë nga videoja e publikuar.
Po ashtu oficerët dëgjohen duke thënë se në veturën e tij nuk është gjetur asgjë.
Nëna e Nichols, RowVaughn Wells, ka thënë se djali i saj ishte vetëm rreth 70 metra nga shtëpia kur oficerët e policisë së Memphisit “e vranë”.
Një nga avokatët, Antonio Romanucci, tha: “Ky i ri, sipas përkufizimit të ligjit në këtë shtet, ishte i terrorizuar”.
Menjëherë pas ngjarjes dhjetra protestues mbyllën një urë rrugore në zonën e Memphis të premten mbrëma, ndërsa demonstrata në shkallë të vogël u mbajtën në qytete të tjera të SHBA, duke përfshirë Nju Jork dhe Uashington DC.
Pas publikimit të videove, Zyra e Sherifit të Qarkut Shelby tha se dy nga zëvendësit e saj ishin liruar gjithashtu nga detyra në pritje të një hetimi për sjelljen e tyre./Opinion.al
