Deputetët opozitarë dhe mbështetësit e tyre bllokuan parlamentin në Poloni si shenjë proteste kundër qeverisë për masat e marra kundër lirisë së shtypit. Sipas asaj që raportohet, në 2017 vetëm disa gazetarë do të lejohen të raportojnë brenda parlamentit.
Protestuesit bllokuan parlamentin Polak në Varshavë gjatë një manifestimi mbështetës për deputetët opozitarë që janë të pakënaqur rreth masave të reja shtrënguese në lidhje me raportimin e lajmeve. Policia ndërhyri për t’i hapur një rrugë kalimi për zyrtarët qeveritarë, të cilët u larguan me makina në orët e para të së shtunës.
Qeveria populiste e djathtë në Poloni dëshiron që të limitojë numrin e reporterëve që lejohen për të mbuluar parlamentin. Protesta e opozitës shtyu votimin e buxhetit, i cili u kalua më pas në një sallë tjetër të improvizuar. Për këtë opozita akuzoi qeverinë se kaloi buxhetin e vitit të ardhshëm në kundërshtim me ligjin duke kaluar votimin në një sallë më të vogël duke përjashtuar gazetarët.
Ishte hera e parë që prej vendosjes së demokracisë në vitin 1989, që një votim I tillë u mbajt jashtë sallës kryesore të parlamentit. Ishin mjaftueshëm deputetët për të bërë votimin të vlefshëm, sipas liderit partisë qeveritare “Ligj dhe Drejtësi”, Jaroslav Kazinski. Tashmë opozita kërkon një rivotim në dhomën kryesore të parlamentit javën që vjen.
Në 2017 vetëm disa gazetarë do të lejohen të raportojnë brenda në parlament, ndërsa vetëm 5 stacione televizive do të kenë aksesin për regjistruar sesionet parlamentare.
