Me mjete të blinduara dhe forca speciale të RENEA-s dhe FNSH-së Policia e Shtetit po ushtron kontrolle në fshatin Nikël të Fushë-Krujës. Nuk dihet cili ka qenë qëllimi konkret i këtij operacioni që drejtohej nga Drejtori i Përgjithshëm i Policisë së Shtetit, Ardi Veliu. Nga pamjet që u transmetuan nga Report Tv shihet se fëmijët lëvizin lirisht në mes të policëve të veshur me antiplumb dhe mjeteve të blunduara të policisë.
Report Tv raporton se janë kontrolluar banesat e Flamur Hakës i njohur me nofkën Tuku, Marenglen Hakës, Durim dhe Valter Bamit, Ylli Cangut etj. “Nga operacioni 8 persona u shoqëruan, ndërsa 2 prej të cilëve kanë urdhër arresti Durim Bami dhe Flamur Haka. Ndërsa të shoqëruar janë Marenglen Haka (nipi i Flamur Hakës), Bedri Haka, Valter Bami dhe Ylli Cangu (kunati i Durim e Valter Bamit). Ylli Cangu është djali i Naim Cangut që mbeti i vrarë në atentatin e Azem Hajdarit. Naim Cangu ishte me Fatmir Haklajn dhe Jaho Mulosmanin. Fillimisht pas nisjes së operacionit në orën 05:00 policia shoqëroi në mjet të blinduar Tukun, që njihet si më kryesori i Niklës, më pas personat e tjerë, të cilët dyshohen se janë përfshirë në disa ngjarje kriminale në këtë zonë”, raporton ky televizion.
Sakaq Policia e Shtetit nuk ka dhënë asnjë informacion zyrtar mbi qëllimin e këtij operacioni, dhe emrat e personave të ndaluar.
