Që prej ditës së djeshme protesta e studentëve ka marrë tjetër rrjedhë. Ata nuk janë duke u tubuar në rrugë, por protesta është zhvendosur brenda ambienteve të fakulteteve. Ashtu si në fakultetin e Drejtësisë, mësojmë se edhe në fakultetin e Ekonomisë në Tiranë, policia ka ndërhyrë me dhunë për të shpërndarë studentet e ngujuar në ambientet e fakultetit të tyre.
Në pamjet e mëposhtme shohim një polic duke u konfliktuar brenda fakultetit të Ekonomisë, me një student. Polici duket teksa dhunon studentin i cili i kërkon të heqë duart prej tij.
“Kush je ti që i fut duart në fyt, kush je ti mor? Lëshoje se e mbyte, qetësohu”, dëgjohen të thonë studentët e tjerë të frikësuar, teksa polici largohet i irrituar duke ofenduar “zagar” studentin.
Kujtojmë se studentët pasi kanë qendruar gjatë gjithë ditës së djeshme, kanë vendosur të rrinë në ngujuar edhe gjatë natës. Policia private dhe policia e shtetit kanë tentuar të pengojnë studentët të vazhdojnë rezistencën e tyre.
