Partia Demokratike ka dalë në mbrojtje të tregtarëve të Shkodrës të cilët u përplasën fizikisht paraditen e sotme me policinë dhe njësinë së hetimit doganor. Sherri që më pas çoi në kanosjen e tregtarëve nga shefi i policisë, lindi pasi u sekuestrua duhani i grirë tregtarëve të Shkodrës. Doganat thanë se aksioni nisi për goditjen e prodhimit dhe tregtimit në mënyrë të paligjshme të duhanit për të cilin duhet të paguhet akcizë.
Në momentet kur u është sekuestruar malli, tregtarët kanë kundërshtuar me forcë dhe janë përleshur fizikisht me policët e doganierët. Më tej situata degjeneroi pasi Shefi i Antikrimit Ekonomik në Shkodër, Pjerin Lazri nxori pistoletën në turmë.
Pas ngjarjes policia tha se kanë nisur hetimet për të gjitha palët, ndërsa nuk ka marrë asnjë masë ndëshkimore ndaj shefit “cub”.
Nga ana tjetër Partia Demokratike reagoi për ngjarjen. Në fillim ishte dega e PD-së në Shkodër që dënoi veprimet policore në tejkalim të detyrës dhe më pas lideri demokrat Lulzim Basha i cili deklaroi:”Shteti-bandë i Edi Ramës sot në Shkodër, duke grabitur e kërcënuar me armë qytetarët. Ligji është i shenjtë e duhet zbatuar, por kur Edi Rama me bandën e tij është shkelësi më i madh i ligjit në vend, atëherë revolta është zgjidhja”.
Po kështu edhe Kryetarja e Bashkisë, Voltana Ademi tha se Rama po shkakton terror politik në Shkodër.
