Policia e Hong Kongut është kritikuar ashpër për arrestimin me forcë të një vajze 12-vjeçare, familja e së cilës thotë se u kap në një turmë proteste ndërsa po blinte pajisje arti.
Një video e shpërndarë gjerësisht në mediat sociale dhe në mediat e Hong Kongut tregoi oficerët që kërkonin të rrethonin një grup njerëzish, përfshirë vajzën e re, e cila u mënjanua dhe u përpoq të ikte. Një oficer e rrëzoi atë në tokë, ndërsa disa të tjerë ndihmuan për ta ulur poshtë.
Më shumë policë të forcave speciale shfaqen, duke mbajtur në tokë vajzën dhe vëllain e saj, i cili ishte përpjekur ta ndihmonte. Oficerë të tjerë u thonë gazetarëve dhe kalimtarëve të rastit – shumë prej të cilëve shfaqen të indinjuar nga aksioni i policisë – të qëndrojnë prapa.
Media lokale thotë se vajza dhe vëllai i saj më i madh u dërguan më vonë në spital për dëmtime të lehta. Policia i gjobiti ata për shkeljen e rregullave të distancimit shoqëror që ndalojnë mbledhjet e më shumë se dy personave.
Policia thotë se vajza mori pjesë në një tubim të paligjshëm dhe oficerët përdorën “forcë minimale” pasi ajo “iku në një mënyrë të dyshimtë”.
Familja e vajzës thotë se ajo ishte thjesht për të blerë pajisje shkollore dhe u frikësua kur u përball me policinë.
Gati 300 vetë u arrestuan në demonstratën e paautorizuar të së Dielës.
Protestat ishin për vendimin e qeverisë për të shtyrë zgjedhjet për parlamentin e Hong Kongut me një vit. Qeveria tha se kjo ishte e nevojshme mes pandemisë së koronavirusit, por aktivistët thanë se qeveria po përdorte pandeminë si pretekst për të ndaluar njerëzit të votonin./ Opinion.al
