Pas më shumë se 4 muajsh, Kryeministri i Kosovës, Albin Kurti dhe Presidenti i Serbisë, Aleksandër Vuçiç janë ulur përballë në tryezën e bisedimeve nën ndërmjetësimin e BE-së.
Këto janë pamjet që vijnë nga Brukseli, nga takimi trepalësh që është duke u zhvilluar. Kurti dhe Vuçiç shfaqen teksa shohin dokumentet që kanë marrë me vete në tryezë. Në një moment të caktuar shikojnë njëri-tjetrin sy më sy.
Kujtojmë se fillimisht, dy liderët u takuan veçmas me përfaqësuesit e BE-së, Josep Borrell dhe Miroslav Lajçak.
Temë diskutimi do të jetë zbatimi i Marrëveshjes për normalizimin e marrëdhënieve, e arritur gojarisht mes Kurtit dhe Vuçiç në muajin shkurt.
Kjo marrëveshje me 11 nene parasheh, mes tjerash, një nivel të vetëmenaxhimit për komunitetin serb në Kosovë; kërkon nga Kosova dhe Serbia që t’i pranojnë dokumentet dhe simbolet e njëra-tjetrës, dhe i obligon ato që të mos e pengojnë njëra-tjetrën në proceset integruese.
Kurti dhe Vuçiç, sipas agjendës që ka publikuar BE-ja, do të diskutojnë edhe për “çështjet aktuale”.
Shtetet e Bashkuara u kanë bërë thirrje që t’i marrin seriozisht obligimet e tyre.
