Koronavirusi është kthyer në shqetësim botëror dhe kjo është pranuar edhe nga Organizata Botërore e Shëndetësisë e cila pranoi dje se sëmundja që shkaktohet nuk është një grip i thjeshtë.
Shqipëria fatmirësisht nuk është në hartën e vendeve të prekura por OBSH-ja u ka bërë thirrje të gjitha vendeve të marrin masa parandaluese.
Ministria e Shëndetësisë ka deklaruar se ka marrë masat por opozita ka akuzuar se kjo nuk është e vërtetë.
Ish-deputeti Bardh Spahia ka publikuar sot një video ku sipas tij zhvillohet një bisedë mes, Drejtoreshës së Qendrës Shëndetësore nr.8 në Tiranë, Blerta Berberi dhe punonjësve. Në bisedë e sipër ajo dëgjohet t’i shpërndajë mjekëve 40 maska por nga ana tjetër thotë se nuk kanë doreza. Për këtë fakt ajo i nxit mjekët që të lajnë duart por ata e informojnë se prej kohësh nuk ka ujë, pasi ai vjen vetëm në një orar të caktuar. Ata madje i thonë se nuk kanë as alkool për tu dezinfektuar por për këtë drejtoresha i thotë se mund të marrin nga shtëpia raki.
Postimi i ish-deputetit Bardh Spahia
Kush ka mundësinë të bisedojë me një mjek, e kupton menjëherë se të ashtuquajturat masa të qeverisë kundër koronavirusit te ri janë vetëm propagandë. Më të pambrojturit janë mjekët. Deri kur ne bëmë publike të vërtetën se Qendrat Shëndetësore janë të papërgatitura, atje mungonin edhe masat më elementare. Video e vërteton plotësisht këtë. Për fat të keq, Drejtoresha e Qendrës Shëndetësore nr.8 Blerta Berberi provoi se është një militante partiake që, në vend të shqetësohet për personelin mjekësor dhe qytetarët, u kërkon llogari mjekëve pse komunikojnë me opozitën për t’u thënë qytetarëve të vërtetën. /Opinion.al
