Një 26 vjeçar u vra me thikë në vendin e tij të punës në një lokal në Ferizaj mbrëmjen e së shtunës.
Elvedin Ibrahimi thuhet se kishte pasur edhe më herët zënka me dy sulmuesit.
T7 ka siguruar pamje të momentit kur dy sulmuesit godasin shtetasin Elvedin Ibrahimi i cili punonte si roje sigurimi në këtë lokal në Ferizaj, ku u plagos për vdekje nga të dyshuarit D.SH, 29 vjeç dhe nga M.M, 22 vjeç.
Disa qytetarë pas kamerave, thanë se të dy palët kanë qenë në konflikt prej vitesh.
Madje sipas tyre edhe Elvedini e kishte plagosur vrasësin e tij, kohë më parë.
Këtë e konfirmon edhe pronari i lokalit ku Elvedini u vra.
Fahri Bega thotë se kjo nuk është hera e parë që punonjësi i tyre ishte sulmuar nga po i njëjti person.
Pronari i lokalit tha se nuk po punonin për shkak që kishin ditë zie.
Sipas tij Elvedini ishte një djalë shumë i sjellshëm me të gjithë.
Bega tha se ishte ankuar në prokurori edhe para një viti kur Elvedini ishte sulmuar në vend të punës. Krahas kësaj ai u shpreh se nuk ishte ndërmarrë asgjë.
Që këta dy persona kanë pasur probleme edhe më parë, e konfirmon edhe zëdhënësi i policisë për rajonin e Ferizajt, Agim Gashi.
Ibrahimi u varros në orën 16:00 gjatë ditës së shtunë, ndërsa Hetuesit policorë në bashkëpunim me prokurorin e shtetit janë duke u marrë me rast.
