Ky që shihni në pamjet e mëposhtme është Orest Sota, biznesmeni që u kap me plot 863 mijë euro në makinë dhe me tre patenta skafi, dy të Saimir Tahirit dhe një e gruas së Tahirit. Ai ka dalë sot para togave të zeza të Elbasanit për masën e sigurisë.
Gjykata e ka lënë në arrest me burg biznesmenin 25-vjeçar. Mbi Sotën rëndojnë tre akuza; drejtim pa leje të automjetit, mosbindje ndaj urdhrit të policisë dhe fshehja e të ardhurave. 25 vjeçari si dhe avokati i tij nuk i kanë pranuar akuzat dhe kanë kërkuar hetim në gjendje të lirë. Por trupi gjykues e ka cilësuar të drejtë kërkesën e prokurorit dhe ka vendosur masën e sigurisë me burg.
Ai nuk ka pranuar të flasë sot para gjykatësve se përse i mbante patentat e Tahirit në korskotin e makinës së tij. Por gjatë marrjes në pyetje ditën e djshme ka thënë se “ato i kishte harruar në mjetin e tij, shoferi i Tahirit”.
Orest Sota nga Tirana u arrestua në flagrancë në datën 1 nëntor në rrugën nacionale Elbasan-Peqin në fshatin Balldren, pasi ka kundërshtuar patrullën e policisë për të ndaluar. Policia u vu në në ndjekje dhe e gjeti pa leje drejtimi për makinën. Gjatë kontrollit në automjet iu gjetën dhe iu sekuestruan mbi 863 mijë euro pa dokument shoqërues të origjinës së parave. Gjithashtu nga kontrolli i ushtruar u gjetën edhe 2 patenta skafi të ish-ministrit të Brendshëm Saimir Tahiri e një të bashkëshortes së tij.
