Princi Leka II dhe nga e shtuna Princeshë Elia Leka u lidhën në martesë në një ceremoni madhështore që u mbajt në Pallatin Presidencial, dikur Pallati Mbretëror që u ndërtua pikërisht nga Mbreti Zog në vitin 1936.
Në ceremoninë e celebrimit ishin të pranishëm përfaqësues të Familjeve të mëdha Mbretërore të Evropës por edhe nga bota, mes tyre Mbretëresha Sofia e Spanjës, Princi Michael I Kentit dhe bashkëshortja e tij nga Mbretëria e Bashkuar, Princi i Luksemburgut, Princët nga Lihtneshtejni, Princesha Lalla Salma e Marokut, pretendendët për fronin mbretëror të Serbisë. Përfaqësues të familjeve mbretërore të Italisë, Austrisë, Malit të Zi, Greqisë dhe Rusisë ishin po ashtu të pranishëm.
Pikërisht kjo martesë, e konsideruar si dasma që ndezi Tiranën, është tema e mbrëmjes në emisionin ‘Opinion’ në TV Klan.
Kryetari i Partisë Levizja e Legalitetit, Sulejman Gjana theksoi se dy unazat e martesat janë realizuar nga një shtëpi mjaft e njohur zvicerane e krijimit të bizhuterive të veçanta, në dy unazat, është shënuar data, emri i princeshës dhe i princit, si dhe stema mbretërore. Dy unazat janë realizuar me flori të bardhë, platin.
Gjana ka bërë me dije se ato janë bërë dhuratë nga një mik belg i familjes. Ai bëri me dije se përgatitjet rreth dasmës kanë vazhduar rreth gjashtë muajsh. Ndërsa, Gjana bëri me dije se kostot e kësaj dasme ende nuk i ka mësuar. Pavarësisht kësaj, ai tha se gjithçka është bërë në përputhje me stilin e jetës të të pranishmëve.
“Në këtë dasmë kanë marrë pjesë shumica e familjeve mbretërore të Europës, por jo vetëm. Familja mbretërore shqiptare ka gëzuar të gjitha privilegjet e një familje mbretërore, i ka gëzuar gjithmonë ato. Pavarësisht se dikush ka dashur për ta paraqitur sikur nuk i ka gëzuar këto të drejta”, tha Gjana.
Shiko videon:
